ខេត្តកណ្តាល ៖ អជ្ញាធរខេត្តកណ្ដាល ចុះសម្របសម្រួលដោះស្រាយជាមួយប្រជាពលរដ្ឋប្រេីប្រាស់ទឹក អាងមេទឹកអង្គុំរបស់រដ្ឋ ក្នុងឃុំកំពង់អុស ស្រុកពញាឮ ក្នុងគម្រោងជីកស្តារអាចម៍ដី យកសាងសង់ផ្លូវថ្មីប្រវែង៥គីឡូម៉ែត្រ និងបង្កេីនបរិមាណស្តុកទឹក សម្រាប់ប្រជាពលរដ្ឋនិងសាធារណជនប្រេីប្រាស់ ។
---------------- ព្រឹកថ្ងៃទី៦ ខែមីនា ឆ្នាំ២០២៣ ឯកឧត្តម តាំង ម៉េងលាន អភិបាលរងខេត្តកណ្តាល បានដឹកនាំមន្ត្រីមន្ទីរជំនាញពាក់ព័ន្ធ និងអជ្ញាធរស្រុក ឃុំ ជួបជាមួយប្រជាពលរដ្ឋចំនួន២២គ្រួសារ ដែលប្រេីប្រាស់ទឹក ក្នុងអាងមេទឹកអង្គុំរបស់រដ្ឋ ដែលអាងមេទឹកនេះស្ថិតនៅភូមិបឹងក្តុល ឃុំកំពង់អុស ស្រុកពញាឮ ដេីម្បីធ្វើការសម្របសម្រួលដោះស្រាយក្នុងគម្រោងរបស់រដ្ឋ ជីកស្តារយកអាចម៍ដីមកសាងសង់ផ្លូវថ្មីប្រវែង៥គីឡូម៉ែត្រ និងបង្កេីនបរិមាណស្តុកទឹក សម្រាប់ប្រជាពលរដ្ឋ និងសាធារណជនប្រេីប្រាស់ ។
នៅក្នុងឱកាសនោះ ឯកឧត្ដមអភិបាលរងខេត្ត បានពន្យល់ប្រជាពលរដ្ឋទាំង២២គ្រួសារ អំពីច្បាប់ស្តីពីការគ្រប់គ្រង និងទោសទាន់ ចំពោះអ្នកដែលរំលោភបំពាន ទន្ទ្រាន ដីដ្ឋ បឹងបួរ ទន្លេរ ព្រែក ស្ទឹង ប្រទ្បាយ អាងមេទឹក ជាដេីម ធ្វើជាកម្មសិទ្ធិផ្ទាល់ខ្លួន ជូនដល់ប្រជាពលរដ្ឋបានយល់បានដឹង ។ ឯកឧត្ដមក៏បានជម្រាបជូនប្រជាពលរដ្ឋថា ការជីកស្តារអាងមេទឹកនេះ គឺយកអាចម៍ដីទៅសាងសង់ផ្លូវប្រវែង៥គីឡូម៉ែត្រ ទទឹង៨ម៉ែត្រ កំពស់៨ម៉ែត្រ ដែលតភ្ជាប់ពីផ្លូវបេតុងមាត់ទន្លេត្រង់ចំនុចភូមិបឹងក្តុល ឃុំកំពង់អុស ស្រុកពញាឮ ទៅកាន់ភូមិព្រែកឫស ឃុំសំបួរមាស ស្រុកមុខកំពូល អនុវត្តការសាងសង់ដោយអគ្គនាយកដ្ឋានបច្ចេកទេសនៃក្រសួងការពារជាតិ ។ ផ្លូវនេះសម្រាប់បម្រើអោយផលប្រយោជន៍សាធារណជនដែលបានប្រេីប្រាស់ និងចូលរួមលេីកស្ទួយសេដ្ឋកិច្ចជាតិ ម្យ៉ាងវិញទៀតការជីកស្តារអាងមេទឹកនេះក៏បានជួយបង្កេីនបរិមាណស្តុកទឹកអោយបានកាន់តែច្រេីនទ្បេីង សម្រាប់បងប្អូនប្រជាពលរដ្ឋក្នុងឃុំកំពង់អុសប្រេីប្រាស់ផងដែរ ។
