ខេត្តកណ្តាល ៖ រដ្ឋបាលខេត្តកណ្ដាល រួមជាមួយមន្ទីរអង្គភាពជុំវិញខេត្ត មន្ត្រីរាជការ និងអាជ្ញាធរក្រុងអរិយក្សត្រ នាំយកនូវទេយ្យទាន បច្ច័យ និងទៀនចំណាំព្រះវស្សា យកទៅប្រគេនដល់ព្រះសង្ឃ ដែលគង់ចាំព្រះវស្សាវចំនួន២៧វត្ត ទូទាំងក្រុងអរិយក្សត្រ ក្រោមអធិបតីភាពឯកឧត្ដម គង់ សោភ័ណ្ឌ អភិបាល នៃគណៈអភិបាលខេត្តកណ្ដាល នារសៀលថ្ងៃទី២៤ ខែកក្កដា ឆ្នាំ២០២៣ នៅវត្តស្វាយជ្រុំ ក្រុងអរិយក្សត្រ ខេត្តកណ្ដាល។ មានប្រសាសន៍ ទៅកាន់ពុទ្ធបរិស័ទ ព្រះសង្ឃ ឯកឧត្ដម គង់ សោភ័ណ្ឌ អភិបាលខេត្តកណ្ដាល បានលើកឡើងថា ព្រះពុទ្ធសាសនា គឺជាសាសនារបស់រដ្ឋ ដែលយើងទាំងអស់គ្នាមានជំនឿ និងគោរពប្រតិបត្តិតាម ព្រោះថាព្រះពុទ្ធសាសនា បានផ្តល់ការអប់រំផ្លូវចិត្ត ឱ្យប្រព្រឹត្តនូវអំពើល្អ និងចេះជួយយកអាសាគ្នា សាមគ្គីភាពគ្នា រស់នៅក្នុងសង្គមមួយដោយសុខដុមរមនា ។ ឯកឧត្តម អភិបាលខេត្ត បន្តថា ជារៀងរាល់ឆ្នាំ មិនថាពុទ្ធបរិស័ទ ឬសប្បុរសជននោះឡើយ សូម្បីតែអាជ្ញាធរខេត្ត ក៏តែងតែនាំយកនូវទៀនចំណាំព្រះវស្សាមកវេរប្រគេន ដល់ព្រះសង្ឃដែលគង់ចាំព្រះវស្សា នៅតាមទីវត្តអារាមនានាទូទាំងខេត្តកណ្តាល ដែលនេះជាការបង្ហាញនូវការយកចិត្តទុកដាក់គាំទ្រ ផ្នែកវិស័យពុទ្ធសាសនា ដែលជាសាសនារបស់រដ្ឋផងដែរ ។ សូមបញ្ជាក់ថា ទេយ្យទានដែលបានប្រគេនជូនទាំង២៧វត្ត ដោយវត្តព្រះអនុគុណក្រុង ទទួលបាន ទៀនព្រះវស្សា ០១ គូ, អង្ករ៣០០គីឡូក្រាម, ទឹកសុទ្ធ ៥ កេស, ទឹកក្រូច ៥ កេស, មី ១០ កេសតូច, ត្រីខ ១០ យួរ, សាដក ០១ និងបច្ច័យមួយចំនួន។ ចំពោះវត្ត មួយចំនួនទៀត ទទួលបាន ទៀនព្រះវស្សា ០១ គូ, អង្ករ២០០គីឡូក្រាម, ទឹកសុទ្ធ ៥ កេស, ទឹកក្រូច ៥ កេស , មី ៥ កេសតូច, ត្រីខ ១០ យួរ, សាដក ០១ និងបច្ច័យ មួយចំនួនផងដែរ។
![](https://asset.cambodia.gov.kh/provincial/sites/29/2023/07/1-82-1024x682.jpg)
![](https://asset.cambodia.gov.kh/provincial/sites/29/2023/07/2-53-1024x682.jpg)
![](https://asset.cambodia.gov.kh/provincial/sites/29/2023/07/4-49-1024x682.jpg)
![](https://asset.cambodia.gov.kh/provincial/sites/29/2023/07/5-47-1024x682.jpg)
![](https://asset.cambodia.gov.kh/provincial/sites/29/2023/07/6-47-1024x682.jpg)
![](https://asset.cambodia.gov.kh/provincial/sites/29/2023/07/7-45.jpg)
![](https://asset.cambodia.gov.kh/provincial/sites/29/2023/07/8-45.jpg)
![](https://asset.cambodia.gov.kh/provincial/sites/29/2023/07/9-39.jpg)
![](https://asset.cambodia.gov.kh/provincial/sites/29/2023/07/10-29.jpg)