++++++++++++++++++ខេត្តកណ្តាល៖ ព្រឹកថ្ងៃទី១២ ខែវិច្ឆិកា ឆ្នាំ២០២៤ រដ្ឋបាលខេត្តកណ្ដាល បានបិទវេទិកាថ្នាក់ខេត្ត ស្តីពីកំណែទម្រង់វិមជ្ឈការ និងវិសហមជ្ឈការ ដើម្បីសម្រេចបាន ចក្ខុវិស័យកម្ពុជា ឆ្នាំ២០៥០ ក្រោមអធិបតីភាព ឯកឧត្តម ជ័យ សម្បត្តិផល្លា ប្រធានអង្គភាពវិភាគ និងអភិវឌ្ឍគោលនយោបាយ តំណាង ឯកឧត្តម ចាន់ សុធា រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋាន គ.ជ.អ.ប ឯកឧត្ដម នូ សាខន ប្រធានក្រុមប្រឹក្សាខេត្ត និងឯកឧត្ដម គួច ចំរើន អភិបាល នៃគណៈអភិបាលខេត្តកណ្ដាល។ មានប្រសាសន៍ក្នុងពិធីបិទវេទិកា ឯកឧត្ដម គួច ចំរើន អភិបាល នៃគណៈអផិបាលខេត្តកណ្ដាល បានលើកឡើងថា៖ ដើម្បីចូលរួមក្នុងវេទិការវាងរាជរដ្ឋាភិបាល និងរដ្ឋបាលថ្នាក់ក្រោមជាតិ ស្តីពីកំណែទម្រង់វិមជ្ឍការ និងវិសហមជ្ឈការ ដើម្បីសម្រេចចក្ខុវិស័យកម្ពុជាឆ្នាំ២០៥០ វេទិកានាឱកាសនេះពិតជាមមានសារៈសំខាន់ ដែលជាការឆ្លុះបញ្ចាំងឱ្យឃើញកាន់តែច្បាស់ពី សុឆន្ទៈ មនសិការ និងស្មារតីទទួលខុសត្រូវ ក្នុងការចូលរួមចំណែកអនុវត្តនូវ កម្មវិធីនយោបាយរបស់រាជរដ្ឋាភិបាល ក្រោមការដឹកនាំដ៏ឈ្លាសវៃ ប៉ិនប្រសព្វ និងប្រកបដោយគតិបណ្ឌិតរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។ ឯកឧត្ដម អភិបាលខេត្ត បន្តថា៖ វេទិកាថ្នាក់ខេត្ត ស្តីពីកំណែទម្រង់វិម្ឈការ និងវិសហម្ឈការ ឆ្នាំ២០២៤ បានបង្ហាញពីការយល់ដឹងស៊ីជម្រៅអំពី ដំណើរការនឹងសារៈសំខាន់ នៃការងារកំណែទម្រង់វិមជ្ឈការ និងវិសហមជ្ឈការនៅថ្នាក់ក្រោមជាតិរបស់រដ្ឋបាលឃុំ សង្កាត់ ក្រុង ស្រុក មន្ទីរ អង្គភាពនានា ជុំវិញខេត្ត អង្គការសង្គមស៊ីវិល។ តាមរយៈការឆ្លុះបញ្ចាំងអំពីបញ្ហាប្រឈមក្នុងការអនុវត្តមុខងារកំណែទម្រង់វិមជ្ឈការ និងវិសហមជ្ឈការ ដែលរដ្ឋបាលខេត្តទទួលបានរបាយការណ៍ពីរដ្ឋបាលក្រុង ស្រុក ឃុំ សង្កាត់ និងបញ្ហាប្រឈមដែលរដ្ឋបាលខេត្តជួបប្រទះកន្លងមក។ ឯកឧត្ដម បន្ថែមថា៖ វេទិកាថ្នាក់ខេត្ត ដែលមានរយៈពាលមួយថ្ងៃកន្លះបានប្រព្រឹត្តទៅ ពិតជាបានផ្ដល់ឱកាសដល់មន្ទីរ អង្គភាព រដ្ឋបាលក្រុង ស្រុក ឃុំ សង្កាត់ អង្គការសង្គមស៊ីវិល សមាគម ដៃគូរអភិវឌ្ឍន៍ និងអ្នកពាក់ព័ន្ធនានា បានចូលរួមសន្ទនាគ្នា ដើម្បីផ្ដល់នូវព័ត៌មានត្រឡប់ និងសម្ដែងនូវបញ្ហាប្រឈម សំណូមពរ ក្ដីកង្វល់ និងតម្រូវការចាំបាច់ជាអាទិភាពនានា បាននឹងកំពុងជួបប្រទះ ក្នុងការអនុវត្តកំណែទម្រង់វិមជ្ឈការ និងវិសហមជ្ឈការ ដែលនេះបានបង្ហាញយ៉ាងពិតប្រាកដ ពីការអនុវត្តនូវលទ្ធិប្រជាធិបតេយ្យ នៅថ្នាក់ក្រោមជាតិ រួមជាមួយឆន្ទៈពីគ្រប់តួអង្គនៃរដ្ឋបាលថ្នាក់ក្រោមជាតិរបស់ខេត្តក្នុងការអនុវត្តកំណែទម្រង់តាមចក្ខុវិស័យរបស់រាជរដ្ឋាភិបាលកម្ពុជា ដូចប្រសាសន៍ដ៏ខ្ពង់ខ្ពស់របស់ សម្តេចមហាបវរធិបតី នាយករដ្ឋមន្រ្តី បានលើកឡើងថា គ្មានការធ្វើកំណែទម្រង់ណាមួយដែលងាយស្រួលនោះទេ។ កំណែទម្រង់ដែលជោគជ័យផ្អែកលើកត្តាសំខាន់ៗបួន ៖ ចក្ខុវិស័យច្បាស់លាស់, ការប្តេជ្ញាចិត្តខ្ពស់, ការចូលរួមដោយស្មោះត្រង់ និងការលះបង់ ។ នៅក្នុងវេទិកាថ្នាក់ខេត្ត ស្តីពីកំណែទម្រង់វិមជ្ឈការ និងវិសហមជ្ឈការ ដើម្បីចូលរួមសម្រេចបានចក្ខុវិស័យកម្ពុជាឆ្នាំ២០៥០ ឯកឧត្ដមអភិបាលខេត្តខេត្តកណ្តាល បានធ្វើការឆ្លើយបតនូវបញ្ហាប្រឈម និងសំណើសំណូមពរ ដែលរដ្ឋបាលឃុំ សង្កាត់ ក្រុង ស្រុក មន្ទីរ អង្គភាពនានា ជុំវិញខេត្ត អង្គការសង្គមស៊ីវិល បានលើកឡើងនៅក្នុងអង្គវេទិកាផងដែរ។
