ព្រឹកថ្ងៃអង្គារ ១១រោច ខែអស្សុជ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី១៣ ខែតុលា ឆ្នាំ២០២០ ឯកឧត្តម គង់ សោភ័ណ្ឌ អភិបាល នៃគណៈអភិបាលខេត្ត និង ឯកឧត្តម ងី ច័ន្រ្ទផល ឯកឧត្តម ងី ច័ន្ទ្រផល រដ្ឋលេខាធិការ ក្រសួងមហាផ្ទៃ និងជាប្រធានគណៈកម្មាធិការគ្រប់គ្រងការអនុវត្តផែនការយុទ្ធសាស្រ្តគណនេយ្យភាពសង្គមថ្នាក់ជាតិ បានអញ្ជើញជាអធិបតីក្នុងពិធីប្រកាសសមាសភាពក្រុមការងារគណនេយ្យភាពសង្គមថ្នាក់ខេត្ត និងផ្សព្វផ្សាយផែនការអនុវត្តគណនេយ្យភាពសង្គមដំណាក់កាលទី២(ឆ្នាំ២០១៩-២០២៣) សម្រាប់រដ្ឋបាលខេត្តកណ្តាល នៅសាលាខេត្តកណ្តាល។
នាពិធីនេះដែរ មានការអញ្ជើញចូលរួមពី ឯកឧត្តម លោកជំទាវ លោក លោកស្រី ប្រតិភូអមដំណើរ ឯកឧត្តម លោកជំទាវ អភិបាលរងខេត្ត លោក ជេដ្ឋ គឹមជុង អនុប្រធានអង្គភាពត្រួតពិនិត្យ វាយតម្លៃ និងព័ត៌មាន និងជាប្រធានសម្របសម្រួលគម្រោងសមាហរណកម្មគណនេយ្យភាពសង្គមទៅក្នុងប្រព័ន្ធរដ្ឋបាលថ្នាក់ជាតិ និងថ្នាក់ក្រោមជាតិ នៃលេខាធិការដ្ឋាន គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ លោក លោកស្រីនាយក នាយករងរដ្ឋបាល លោក លោកស្រី នាយក នាយករងទីចាត់ការ អង្គភាពចំណុះសាលាខេត្ត លោកប្រធានការិយាល័យប្រជាពលរដ្ឋខេត្ត លោកឧត្តមសេនីយ៍ស្នងការ មេបញ្ជាការ កងកម្លាំងទាំងបីរបស់ខេត្ត លោក លោកស្រី ប្រធាន អនុប្រធានមន្ទីរ អង្គភាពជុំវិញខេត្ត លោកអភិបាល អភិបាលរង ក្រុង ស្រុកទាំង១១ លោក លោកស្រី តំណាងអង្គការសុខភាពអន្តរជាតិ(FHI360), វិទ្យាស្ថានតស៊ូមតិ និងគោលនយោបាយ(API) តំណាងអង្គការ សមាគម ជាដៃគូអនុវត្តគម្រោងគណនេយ្យភាពសង្គម សរុបចំនួន១១២នាក់។
ថ្លែងក្នុងពិធីនោះដែរ ឯកឧត្តម បានមានប្រសាសន៍ថា នៅក្នុងឆមាសទី១ ឆ្នាំ២០២០ ជាដើមឆ្នាំទី២ នៃការអនុវត្តកម្មវិធីនយោបាយ និងយុទ្ធសាស្រ្តចតុកោណ ដំណាក់កាលទី៤ របស់រាជរដ្ឋាភិបាល សម្រាប់នីតិកាលទី៦ នៃរដ្ឋសភា។ ក្នុងរយៈពេលនេះ ខេត្តកណ្តាលបានបន្តវិវត្តប្រែប្រួលទៅមុខប្រកបដោយមោទនភាព ក្រោមដំបូលនៃសុខសន្តិភាព និងការអភិវឌ្ឍដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ជាអគ្គមគ្គុទេសក៍ដ៏ឆ្នើម។
តាមរយៈការអនុវត្តយុទ្ធសាស្ត្រចតុកោណរបស់រាជរដ្ឋាភិបាល រហូតមកដល់ពេលបច្ចុប្បន្ន កម្ពុជាបានឆ្លងកាត់ដំណាក់កាលជាច្រើននៃការធ្វើកំណែទម្រង់ក្នុងគោលដៅដើម្បី កំណើន បង្កើតការងារ ធានាសមធម៌ និងប្រសិទ្ធភាព សំដៅសម្រេចឱ្យបាននូវការអភិវឌ្ឍសេដ្ឋកិច្ច និងសង្គមប្រកបដោយចីរភាព សមធម៌ និងបរិយាប័ន្ន។ ក្នុងនោះកំណែទម្រង់វិមជ្ឈការ និងវិសហមជ្ឈការ គឺជារបៀបវារៈដ៏សំខាន់មួយ ក្នុងចំណោមរបៀបវារៈដទៃទៀតនៃកំណែទម្រង់អភិបាលកិច្ចរបស់រាជរដ្ឋាភិបាលកម្ពុជា។ បច្ចុប្បន្ន កំណែទម្រង់វិមជ្ឈការ និងវិសហមជ្ឈការ បានឈានចូលដំណាក់កាលទី៣ នៃផែនការអនុវត្តរយៈពេលបីឆ្នាំ ដែលជាដំណាក់កាលចុងក្រោយនៃការអនុវត្តកម្មវិធីជាតិរយៈពេល១០ឆ្នាំ សម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។ ដំណាក់កាលនេះ ជាដំណាក់កាលផ្ដោតលើការពង្រឹងតួនាទីរបស់រដ្ឋបាលក្រុង ស្រុក ខណ្ឌ ឱ្យក្លាយជារដ្ឋបាលមូលដ្ឋានដ៏មានសក្តានុពលមួយ ដែលមានសមត្ថភាពគ្រប់គ្រាន់ អាចឆ្លើយតបទៅនឹងសេចក្ដីត្រូវការរបស់មូលដ្ឋាន ប្រកបដោយប្រសិទ្ធភាព តាមរយៈការផ្ទេរសិទ្ធិអំណាច មុខងារ និងធនធានកាន់តែច្រើន និងកាន់តែសមស្របទៅឱ្យរដ្ឋបាលក្រុង ស្រុក សំដៅធានាប្រសិទ្ធភាពក្នុងការលើកកម្ពស់គុណភាពជីវិតរបស់ប្រជាពលរដ្ឋ ក៏ដូចក្នុងការអភិវឌ្ឍមូលដ្ឋាន ស្របតាមគោលការណ៍នៃការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។
ទោះបីជា កម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិរយៈពេល១០ឆ្នាំ នឹងត្រូវបញ្ចប់នៅចុងឆ្នាំ២០២០នេះ ក៏ប៉ុន្តែផ្អែកតាមឆន្ទៈនយោបាយរបស់រាជរដ្ឋាភិបាលយុទ្ធសាស្រ្តចតុកោណដំណាក់កាលទី៤ និងផ្អែកលើមេរៀនបទពិសោធន៍នៃការអនុវត្តនាពេលកន្លងមក រាជរដ្ឋាភិបាលនឹងបន្តរៀបចំ និងដាក់ឲ្យអនុវត្តនូវកម្មវិធីជាតិរយៈពេលវែងថ្មីមួយទៀត ដែលត្រូវចាប់ផ្តើមអនុវត្តពីឆ្នាំ២០២១តទៅ ដើម្បីធានាដល់ការបន្តអនុវត្តកំណែទម្រង់នេះឲ្យកាន់តែស៊ីជម្រៅបន្ថែមទៀត។
ជាក់ស្តែង ការប្រកាសក្រុមការងារគណនេយ្យភាពសង្គមថ្នាក់ខេត្ត និងការផ្សព្វផ្សាយផែនការអនុវត្ត គណនេយ្យភាពសង្គម ដំណាក់កាលទី២ ឆ្នាំ២០១៩ ដល់ឆ្នាំ២០២៣ នាពេលនេះ គឺបង្ហាញអំពីការតាំងចិត្តខ្ពស់ក្នុងឆន្ទៈនយោបាយ និងចក្ខុវិស័យរយៈពេលវែងចំពោះការអនុវត្តកំណែទម្រង់វិមជ្ឈការ និងវិសហមជ្ឈការ ដើម្បីធ្វើឲ្យប្រសើរឡើងនូវជីវភាពរស់នៅរបស់ប្រជាពលរដ្ឋនៅមូលដ្ឋាន និងពិសេសផ្តោតទៅលើការផ្តល់សេវាសាធារណៈជូនប្រជាពលរដ្ឋ ដោយរាប់បញ្ចូលទាំងស្រ្តី កុមារ ជនជាតិដើមភាគតិច ជនងាយរងគ្រោះនានា និងជនមានពិការភាពជាដើម ដោយមានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) ជាសេនាធិការក្នុងការសម្របសម្រួលបំពេញបេសកកម្មនេះ។
ខេត្តកណ្តាល ជាខេត្តគោលដៅមួយក្នុងចំណោមខេត្តគោលដៅទាំង២៥រាជធានី ខេត្ត ក្នុងការអនុវត្តកម្មវិធីគណនេយ្យភាពសង្គមដំណាក់កាលទី២ និងមានតំបន់គោលដៅរបស់កម្មវិធីនៅក្រុង ស្រុក ចំនួន០៨ រួមមាន ក្រុងតាខ្មៅ ស្រុកកៀនស្វាយ ខ្សាច់កណ្តាល លើកដែក មុខកំពូល អង្គស្នួល ពញាឮ និងស្រុកស្អាង។
ដោយមើលឃើញអំពីសារៈសំខាន់នៃការអនុវត្តការងារគណនេយ្យភាពសង្គម ឆ្លៀតឱកាសនេះ ឯកឧត្តម បានរំលឹកដល់ក្រុមការងារគណនេយ្យភាពសង្គមថ្នាក់ខេត្ត និងក្រុមការងារគណនេយ្យភាពសង្គមថ្នាក់ក្រុងស្រុក ពិសេសក្រុងស្រុកគោលដៅទាំង៨ ឲ្យបានជ្រាបថា ការងារគណនេយ្យភាពសង្គម គឺជាផ្នែកដ៏សំខាន់មួយនៃអភិបាលកិច្ចល្អ និងជាដំណើរការនៃការចូលរួមរវាងប្រជាពលរដ្ឋ និងរដ្ឋបាលថ្នាក់ក្រោមជាតិប្រកបដោយការស្ថាបនា តាមរយៈការធ្វើសេចក្តីសម្រេចចិត្តជាសាធារណៈ និងអនុវត្តសកម្មភាពនានា។ សកម្មភាពទាំងនោះ រួមបញ្ចូលសកម្មភាពដែលប្រជាពលរដ្ឋ និងតំណាងប្រជាពលរដ្ឋ អាចធ្វើការផ្តល់យោបល់សម្រាប់ឆ្លើយតបតម្រូវការជាអាទិភាពនៅមូលដ្ឋាន និងត្រួតពិនិត្យតាមដានពីការអនុវត្តតួនាទី ភារកិច្ចរបស់ក្រុមប្រឹក្សា មន្រ្តី និងអ្នកផ្តល់សេវា នៃសេវារដ្ឋបាលឃុំ សង្កាត់ សេវាអប់រំ (សាលាបឋមសិក្សា) សេវាសុខាភិបាល (មណ្ឌលសុខភាព) និងសេវារដ្ឋបាលក្រុង ស្រុក ក៏ដូចជាសេវាមួយចំនួនទៀត ស្របទៅតាមការផ្ទេរមុខងារ និងធនធានទៅឲ្យរដ្ឋបាលថ្នាក់ក្រោមជាតិ។
ដើម្បីអនុវត្តការងារគណនេយ្យភាពសង្គមឲ្យទទួលបានលទ្ធផលវិជ្ជមាន ត្រូវការជាចាំបាច់នូវផែនការយុទ្ធសាស្រ្តគណនេយ្យភាពសង្គម ដែលជាត្រីវិស័យសម្រាប់រៀបចំនូវការងារទាំងឡាយ ក្នុងគោលបំណង និងទិសដៅផ្តល់សិទ្ធិអំណាចដល់ប្រជាពលរដ្ឋ ក្នុងការចូលរួមពង្រឹងការចាត់ចែង ការប្រើប្រាស់ថវិកា និងការផ្តល់សេវាសាធារណៈនៅថ្នាក់ក្រោមជាតិប្រកបដោយគុណភាព ប្រសិទ្ធភាព ស័ក្តិសិទ្ធភាព តាមរយៈការលើកកម្ពស់នូវភាពងាយទទួលបានព័ត៌មាននានា និងការចូលរួមពិនិត្យតាមដានលើការបំពេញតួនាទី ភារកិច្ច និងការងារថវិការបស់រដ្ឋបាលថ្នាក់ក្រោមជាតិ។ ដើម្បីសម្រេចបាននូវទស្សនៈវិស័យនេះ រាជរដ្ឋាភិបាលកម្ពុជាបានដាក់ចេញនូវគោលនយោបាយនានា ក្នុងនោះក៏មានកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិរយៈពេល១០ឆ្នាំ ដែលបានចាប់ផ្តើមអនុវត្តតាំងពីឆ្នាំ២០១០។ ការអនុវត្តកំណែទម្រង់វិមជ្ឈការ និងវិសហមជ្ឈការរបស់រាជរដ្ឋាភិបាលកម្ពុជា នៅរដ្ឋបាលថ្នាក់រាជធានី ខេត្ត ក្រុង ស្រុក ខណ្ឌ និងឃុំ សង្កាត់ គឺបានធ្វើឡើងជាបន្តបន្ទាប់។ ថ្មីៗនេះ រដ្ឋបាលខេត្ត ក៏ដូចជារដ្ឋបាលក្រុងស្រុក ទទួលបាននូវការប្រគល់មុខងារ និងការផ្ទេរមុខងារ ធនធាន រួមនឹងការកែសម្រួលរចនាសម្ពន័្ធគ្រប់គ្រង ជាពិសេសគឺនៅថ្នាក់ក្រុងស្រុក។
ដោយឡែក សម្រាប់ការគ្រប់គ្រងនៅថ្នាក់រដ្ឋបាលឃុំ សង្កាត់វិញ គឺសង្កេតឃើញថា ថ្នាក់ជាតិបាននឹងកំពុងជម្រុញឲ្យមានការអនុវត្តធ្វើឲ្យប្រសើរឡើង ទាំងក្នុងការផ្តល់សេវារដ្ឋបាលសាម៉ី និង ការគ្រប់គ្រងដែលគ្របដណ្ដប់ទៅលើសេវានៅមណ្ឌលសុខភាពក៏ដូចជាសាលាបឋមសិក្សាជាដើម។ ការផ្តល់សេវាដល់ប្រជាពលរដ្ឋ នៅថ្នាក់រដ្ឋបាលឃុំ សង្កាត់ នៅតាមមណ្ឌលសុខភាព សាលារៀន ជាដើម គឺធ្វើយ៉ាងណាឲ្យមានភាពល្អប្រសើរជាងមុន និងមានការពេញចិត្ត លើការប្រើប្រាស់ទទួលនូវសេវាច្រើនជាងមុន ពីប្រជាពលរដ្ឋនៅកម្រិតមូលដ្ឋាន និងការកាត់បន្ថយនូវគម្លាតរវាងប្រជាពលរដ្ឋ និងអ្នកផ្គត់ផ្គង់ផ្តល់សេវា។ ហើយអ្នកដែលអនុវត្តផ្ទាល់ ចំពោះសកម្មភាពទាំងនេះ គឺរដ្ឋបាលក្រុងស្រុក ការិយាល័យអប់រំ យុវជន និងកីឡា ការិយាល័យសុខាភិបាលស្រុកប្រតិបតិ្ត រដ្ឋបាលឃុំសង្កាត់ មណ្ឌលសុខភាព និងសាលាបឋមសិក្សានៅនឹងមូលដ្ឋាន។ ដូច្នេះ ឯកឧត្តម បានស្នើដល់ប្រតិបត្តិករ ជាផ្នែកផ្គត់ផ្គង់ ដែលរួមមានតួអង្គក្រសួង ស្ថាប័ន និងក្រុមការងារគណនេយ្យភាពសង្គមថ្នាក់ខេត្ត ក្រុងស្រុក អាជ្ញាធរមូលដ្ឋាន តាមរយៈផែនការយុទ្ធសាស្រ្តស្តីពីការងារគណនេយ្យភាពសង្គម សូមឲ្យមានការពិគ្រោះយោបល់ជាមួយអង្គការសង្គមស៊ីវិល ប្រជាពលរដ្ឋ និងអ្នកពាក់ព័ន្ធនានា ដែលជាផ្នែកតម្រូវការ ដើម្បីកំណត់យុទ្ធសាស្រ្តចាំបាច់ក្នុងការអនុវត្តសកម្មភាពជាក់លាក់ និងតួនាទីភារកិច្ចរបស់ស្ថាប័នរដ្ឋ ដៃគូអភិវឌ្ឍ និងអង្គការសង្គមស៊ីវិល ក្នុងការចូលរួមចំណែកអនុវត្តការងារគណនេយ្យភាពសង្គម ដំណាក់កាលទី២ (២០១៩-២០២២) ឲ្យទទួលបានជោគជ័យ។
ជាមួយគ្នានេះ ដើម្បីឲ្យការអនុវត្តដំណើរបានល្អ ឯកឧត្តម បានស្នើដល់ លោក លោកស្រី ជាប្រតិបត្តិករ ព្យាយាមទទួលនូវចំណេះដឹងពាក់ព័ន្ធទៅនឹងការងារទាំងនេះបន្ថែមទៀត ពីមន្រ្តីបច្ចេកទេសគាំទ្រគម្រោងនៅថ្នាក់ជាតិ ជាពិសេសគឺលេខាធិការដ្ឋាន នៃគ.ជ.អ.ប និងដៃគូរសហការអនុវត្តគម្រោងជាដើម។ ទន្ទឹមនឹងនេះ ឯកឧត្តម ក៏បានសំណូមពរដល់គ្រប់ស្ថាប័ន អង្គភាព ក៏ដូចជាក្រុមការងារគណនេយ្យភាពសង្គមខេត្ត ក្រុង ស្រុកនិងឃុំសង្កាត់ រួមទាំងអង្គការសង្គមស៊ីវិល និងដៃគូរអភិវឌ្ឍន៍ ដែលមានការពាក់ព័ន្ធ ត្រូវសហការគ្នា អត់ធ្មត់ យោគយល់ អធ្យាស្រ័យ ដោយអនុវត្តបណ្តើរ រៀនបណ្តើរ និងកែលម្អរបណ្តើរ ព្រោះថានេះជាការងារថ្មីទាំងអស់គ្នា ដែលត្រូវអនុវត្តរួមគ្នា មិនអាចខ្វះភាគីណាមួយបានឡើយ។
