++++++++++++++++++++ខេត្តកណ្ដាល៖ ប្រជាពលរដ្ឋ និងអាជ្ញាធរមូលដ្ឋាននៃស្រុកមុខកំពូល បានលើកឡើងនូវសំណូមពរ និងបញ្ហាប្រឈមជាច្រើនដូចជា៖ បញ្ហាប្លង់គោលស្រុកប៉ះពាល់ដល់ប្រជាពលរដ្ឋ បញ្ហាស្ដារបឹង ប្រឡាយ ព្រែក បញ្ហាការកែសម្រួលសំបុត្រកំណើត បញ្ហាពិបាកក្នុងការផ្ទេរកម្មសិទ្ធិដីធ្លី ស្នើសុំបញ្ចុះតម្លៃទឹកស្អាត និងស្នើសុំសាងសង់សាលាបុណ្យ។ការលើកឡើងនូវបញ្ហាប្រឈម និងសំណូមពរ របស់ប្រជាពលរដ្ឋ និងអាជ្ញាធរមូលដ្ឋាននៃស្រុកមុខកំពូល ធ្វើឡើងក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តកណ្ដាល លើកទី៣ អាណត្តិទី៣ ឆ្នាំ២០២១ ក្រោមអធិបតីភាព ឯកឧត្តម ចាប ម៉ុច សមាជិកក្រុមប្រឹក្សាខេត្ត តំណាងឯកឧត្តមបណ្ឌិត ម៉ៅ ភិរុណ ប្រធានក្រុមប្រឹក្សាខេត្ត និងឯកឧត្តម គីម រិទ្ធី អភិបាលរងខេត្តកណ្ដាល តំណាងឯកឧត្តម គង់ សោភ័ណ្ឌ អភិបាល នៃគណៈអភិបាលខេត្តកណ្ដាល នៅស្រុកមុខកំពូល នាព្រឹកថ្ងៃទី២១ ខែធ្នូ ឆ្នាំ២០២១។បញ្ហាប្រឈម និងសំណូមពរ ដែលប្រជាពលរដ្ឋ និងអាជ្ញាធរមូលដ្ឋាននៃស្រុកមុខកំពូល បានលើកឡើងនោះគឺផ្ដល់សំខាន់ លើបញ្ហាប្លង់គោលស្រុកប៉ះពាល់ដល់ប្រជាពលរដ្ឋ ស្នើសុំមានការកែសម្រួល។ បញ្ហាស្ដារបឹង ប្រឡាយ ព្រែក ស្នើសុំជូនដំណឹងដល់អាជ្ញាធរមូលដ្ឋាន និងប្រជាពលរដ្ឋ។ បញ្ហាការកែសម្រួលសំបុត្រកំណើត ដោយខុសអក្ខរាវិរុទ្ធ ត្រូវធ្វើការកែសំរួលនៅក្រសួងមហាផ្ទៃ ប្រជាពលរដ្ឋស្នើសុំឱ្យការកែសម្រួលធ្វើត្រឹមថ្នាក់ស្រុក។ ពិបាកក្នុងការផ្ទេរកម្មសិទ្ធិដីធ្លី ស្នើសុំបញ្ចុះតម្លៃទឹកស្អាត នៅត្រឹម១៩០០៛ ដែលសព្វថ្ងៃមានតម្លៃ២២០០៛។ រាល់បញ្ហា និងសំណូមពរ ដែលបានលើកឡើងក្នុងវេទិការ ត្រូវបានគណៈអធិបតី មន្ទីរជំនាញ និងអង្គភាពពាក់ព័ន្ធ ធ្វើការដោះស្រាយបានមួយចំនួន និងមួយចំនួនទៀតត្រូវបានលើកជូនក្រុមប្រឹក្សាខេត្ត និងគណៈអភិបាលខេត្តដើម្បីពិនិត្យ និងសម្រេច។ នៅក្នុងវេទិកាផ្សព្វផ្សាយ និងពិគ្រោះយោបល់ ឯកឧត្តម គីម រិទ្ធី អភិបាលរងខេត្តកណ្ដាល បានរាយការណ៍ពីសមិទ្ធផលដែលសម្រេចបានរយៈពេល ៩ខែឆ្នាំ២០២១ របស់រដ្ឋបាលខេត្តកណ្ដាល។ឯកឧត្តម ចាប ម៉ុច សមាជិកក្រុមប្រឹក្សាខេត្ត បានលើកឡើងនៅក្នុងនៅក្នុងវេទិកាផ្សព្វផ្សាយ និងពិគ្រោះយោបល់ នេះដែរថា ការប្រារព្ធឡើងនូវវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តនាឱកាសនេះ គឺជាការអនុវត្តតាមច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ស្តីពីតួនាទីភារកិច្ច និង ទំនាក់ទំនងការងាររបស់ក្រុមប្រឹក្សា គណៈអភិបាលខេត្ត ក្រុមប្រឹក្សា គណៈអភិបាលស្រុក របស់រាជរដ្ឋាភិបាល កម្ពុជា។ ជាមួយគ្នានេះការរៀបចំវេទិកាផ្សព្វផ្សាយ និងពិគ្រោះយោបល់ គឺជាការផ្ដល់ឱកាសជូនប្រជាពលរដ្ឋបាន ប្រាស្រ័យទាក់ទងគ្នាទៅវិញទៅមករវាងរដ្ឋបាលខេត្ត ជាមួយរដ្ឋបាលក្រុង ស្រុក រដ្ឋបាលឃុំ សង្កាត់ ប្រជាពលរដ្ឋ តំណាងអង្គការសង្គមស៊ីវិល វិស័យឯកជន និងក្រុមប្រឹក្សាប្រភេទផ្សេងៗគ្នា ដើម្បីផ្លាស់ប្ដូរ នូវបទពិសោធន៍ និងផ្តល់ប្រឹក្សាអំពីអាទិភាពនៃការអភិវឌ្ឍខេត្តប្រកបដោយចីរភាព និងប្រសិទ្ធភាព ។ ដូច្នេះហើយ រាល់បញ្ហាអាទិភាពរបស់ប្រជាពលរដ្ឋក្នុងមូលដ្ឋាន ត្រូវបានពិនិត្យ និងដោះស្រាយ និងឆ្លើយតប (បាន ឬ មិនបាន) ប្រកបដោយហេតុផលច្បាស់លាស់។ គ្រប់អ្នកពាក់ព័ន្ធទាំងអស់ក្នុងមូលដ្ឋាន ត្រូវបានរួមបញ្ចូលក្នុងដំណើរការអភិវឌ្ឍតាមបែបប្រជា ធិបតេយ្យ ទន្ទឹមនឹងនេះ ក្រុមប្រឹក្សាខេត្តនឹងបង្កើតបាននូវវប្បធម៌នៃការពិភាក្សា និង លើកកម្ពស់គណនេយ្យភាពសង្គមតាមបែបប្រជាធិបតេយ្យ ក្នុងការផ្ដល់ព័ត៌មានជូនប្រជាពលរដ្ឋ អំពីសមិទ្ធផលដែលក្រុមប្រឹក្សាសម្រេចបានកន្លងមក និងបញ្ហាប្រឈមនានាក្នុងការអនុវត្ត។ ផ្ដល់ឱកាសជូនប្រជាពលរដ្ឋលើកឡើងអំពីបញ្ហាសំណើ សំណូមពរ ដែលជួបប្រទះក្នុង ជីវភាពរស់នៅ និងការអនុវត្តតួនាទី ភារកិច្ចរបស់មូលដ្ឋាន ទទួលយកអនុសាសន៍ និងសំណូមពររបស់ប្រជាពលរដ្ឋ ដើម្បីពិភាក្សា និងឆ្លើយតប។ #គីម រិទ្ធី #kimrithy
![](https://asset.cambodia.gov.kh/provincial/sites/29/2021/12/267962210_4468075049987366_5978947341006368211_n-1024x683.jpg)
![](https://asset.cambodia.gov.kh/provincial/sites/29/2021/12/267696025_4467806156680922_1044584170210132805_n-2.jpg)
![](https://asset.cambodia.gov.kh/provincial/sites/29/2021/12/269858186_4468075579987313_4646682857154666750_n-1024x683.jpg)
![](https://asset.cambodia.gov.kh/provincial/sites/29/2021/12/267443824_4468075336654004_8180022156193323725_n-1024x683.jpg)
![](https://asset.cambodia.gov.kh/provincial/sites/29/2021/12/267376870_4468075879987283_7853607988033343953_n-1024x683.jpg)
![](https://asset.cambodia.gov.kh/provincial/sites/29/2021/12/269734718_4468075723320632_1169109513515566466_n-1024x683.jpg)