ខេត្តកណ្តាល៖ រសៀលថ្ងៃទី២៥ ខែមករា ឆ្នាំ២០២២ ឯកឧត្តម គីម រិទ្ធិ អភិបាលរងខេត្តកណ្ដាល អញ្ជើញដឹកនាំកិច្ចប្រជុំត្រៀមរៀបចំបង្កើតគណៈកម្មការ ក្នុងពិធីសម្ភោធដាក់ឱ្យប្រើប្រាស់ជាផ្លូវការ "អគារវះកាត់ អាគារសម្ពោធ និងផ្លូវបេតុង" ក្នុងមន្ទីរពេទ្យបង្អែកជ័យជំនះ ក្រុងតាខ្មៅ ខេត្តកណ្ដាល។មានប្រសាសន៍ក្នុងកិច្ចប្រជុំនេះដែរ ឯកឧត្តម គីម រិទ្ធិ អភិបាលរងខេត្តកណ្ដាល បានស្នើដល់ក្រុមការងារ ត្រូវយប់ចិត្តទុកដាក់ខ្ពស់ ប្រកបដោយការទទួលខុសត្រូវរួមលើការដឹកនាំ គ្រប់គ្រង ចាត់ចែង និងសម្របសម្រួលការងារជាមួយក្រសួងស្ថាប័ន និងសមត្ថកិច្ចពាក់ព័ន្ធឱ្យបានរលូន សុវត្ថិភាព និងប្រសិទ្ធភាពខ្ពស់ក្នុងការរៀបចំ ដើម្បីឱ្យពិធីសម្ភោធដាក់ឱ្យប្រើប្រាស់ជាផ្លូវការ "អគារវះកាត់ អាគារសម្ពោធ និងផ្លូវបេតុង" ប្រកបដោយជោគជ័យ។ ក្នុងនោះដែរ ត្រូវមានក្រុមគ្រូពេទ្យប្រចាំការ នៅគ្រប់គោលដៅសំខាន់ៗ ដើម្បីធានានូវការជួយសង្គ្រោះបន្ទាន់ពេលវេលា ក្នុងករណីមានហេតុការណ៍អ្វីកើតឡើងជាយថាហេតុ។ សូមបញ្ជាក់ផងដែរថា ពិធីសម្ភោធដាក់ឱ្យប្រើប្រាស់ជាផ្លូវការ "អគារវះកាត់ អាគារសម្ពោធ និងផ្លូវបេតុង" ក្នុងមន្ទីរពេទ្យបង្អែកជ័យជំនះ ក្រុងតាខ្មៅ ខេត្តកណ្ដាល នឹងប្រព្រឹត្តទៅនៅថ្ងៃទី២៩ ខែមករា ឆ្នាំ២០២២ ក្រោមអធិបតីភាពឯកឧត្តមអគ្គបណ្ឌិតសភាចារ្យ អូនព័ន្ធ មុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។ #Kimrithy #គីម រិទ្ធី