ខេត្តកណ្ដាល៖ ថ្លែងក្នុងពិធីសម្ភោធឆ្លងកុដិ និងសមិទ្ធផលនានា ក្នុងវត្តពិសីឧត្តម (ហៅវត្តព្រែកឫស្សី) ស្ថិតនៅឃុំកំពង់កុង ស្រុកកោះធំ នៅរសៀលថ្ងៃទី២ ខែមេសា ឆ្នាំ២០២២ ឯកឧត្តម ណុប ដារ៉ា អភិបាលរងខេត្តកណ្តាល តំណាងឯកឧត្តម គង់ សោភ័ណ្ឌ អភិបាលខេត្ត បានបញ្ជាក់ថា សមិទ្ធផលនានាក្នុងវត្តពិសីឧត្តម ដែលដាក់សម្ពោធនាពេលនេះ គឺជាការចូលរួមចំណែករបស់ពុទ្ធបរិស័ទ ដើម្បីធ្វើយ៉ាងណាឱ្យវិស័យពុទ្ធចក្រមានការរីកចម្រើន ស្របពេលដែលប្រទេសជាតិកំពុងតែមានសុខសន្តិភាព និងការអភិវឌ្ឍ ក្រោមការដឹកនាំដ៏ឈ្លាសវៃរបស់ សម្ដេចអគ្គមហា សេនាបតី តេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ឯកឧត្តមបន្ថែមថា ក្រោមការដឹកនាំរបស់រាជរដ្ឋាភិបាលកម្ពុជាដែលមាន សម្ដេចតេជោ ហ៊ុន សែន ជាប្រមុខបានធ្វើឱ្យប្រទេសជាតិ មានសុខ សន្តិភាព និងមានការអភិវឌ្ឈន៍លើគ្រប់វិស័យ ទាំងផ្នែកអាណាចក្រ និងពុទ្ធចក្រ ពិសេសគឺវិស័យព្រះពុទ្ធសាសនាមានការរីកចម្រើន ហើយត្រូវបានរាជរដ្ឋាភិបាលយកចិត្តទុកដាក់ និងលើកតំកើងព្រះពុទ្ធសាសនាជាសាសនារបស់រដ្ឋ ទុកសម្រាបជាទីសក្ការៈ គោរពបូជា និងប្រតិបត្តិពីសំណាក់ពុទ្ធបរិស័ទទូទៅ។ឯកឧត្តម អភិបាលរងខេត្ត បានអំពាវនាវដល់ប្រជាពលរដ្ឋទាំងអស់គ្នា ត្រូវចូលរួមថែរក្សា ការពារសន្តិភាពជាមួយរាជរដ្ឋាភិបាលឱ្យបានគង់វង្ស ពីព្រោះសន្តិភាពគឺមានសារៈសំខាន់ណាស់ មានសន្តិភាពគឺមានការរីកចម្រើន មានសន្តិភាពគឺមានការអភិវឌ្ឍ សុខសន្តិភាពបានធ្វើឱ្យយើងទាំងអស់គ្នាមានសិទ្ធិ និងសេរីភាពគ្រប់បែបយ៉ាងក្នុងការប្រកបមុខរបរ ដើរលេងកំសាន្ត និងការបំពេញបុណ្យកុសជាដើម។ឆ្លៀតក្នុងឱកាសនោះដែរ ឯកឧត្តមក៏បានធ្វើការផ្សព្វផ្សាយដល់ ពុទ្ធបរិស័ទ និងប្រជាពលរដ្ឋ និងសិស្សានុសិស្សត្រូវ មានការប្រុងប្រយ័ត្នខ្ពស់ចំពោះការឆ្លងរីករាលដាលនៃជំងឺកូវីដ-១៩ ចូលក្នុងសហគមន៍ ដោយត្រូវបន្តអនុវត្តបានខ្ជាប់ខ្ជួននូវវិធានអនាម័យរបស់ក្រសួងសុខាភិបាល និងអនុវត្តជាប្រចាំនូវអភិក្រម ដែលជាយ័ន្តដ៏ស័ក្កិសិទ្ធ របស់សម្ដេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាគឺ ៣កុំ និង៣ការពារ។
