ខេត្តកណ្ដាល ៖ ព្រឹកថ្ងៃទី០៥ ខែកញ្ញា ឆ្នាំ២០២២ ឯកឧត្ដម ណុប តារ៉ា អភិបាលរងខេត្តកណ្ដាល តំណាងឯកឧត្ដម គង់ សោភ័ណ្ឌ អភិបាលខេត្តកណ្ដាល បានចូលរួមអមដំណើរអញ្ជើញរបស់ឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ចុះពិនិត្យសំណង់អគារនានា និងហេដ្ឋារចនាសម្ព័ន្ឋ របស់មជ្ឈមណ្ឌលជាតិព្យាបាល និងស្តារនិតិសម្បទាអ្នកញៀនគ្រឿងញៀន ស្ថិតក្នុងឃុំបារគូ ស្រុកកណ្តាលស្ទឹង ។ នាឱកាសចុះត្រួតពិនិត្យសំណង់អាគារ មណ្ឌលស្តារអ្នកគ្រឿងញៀន ឯកឧត្តម វង សូត បានបញ្ជាក់ឲ្យដឹងថា មណ្ឌលយុវនីតិសម្បទា មានតួនាទីយ៉ាងសំខាន់ក្នុងការគ្រប់គ្រងអនីតិជន ក្នុងការផ្តល់នូវការអប់រំ ការបណ្តុះបណ្តាលវិជ្ជាជីវៈ ការអប់រំចិត្តសាស្រ្ត ការព្យាបាល ការថែទាំ ការការពារ និងជួយឲ្យអនីតិជន ក្លាយជាពលរដ្ឋសុច្ចរិត និងមានប្រយោជន៍សម្រាប់សង្គមជាតិ។ គួរបញ្ជាក់ដែរថា មណ្ឌលយុវនីតិសម្បទា ត្រូវបានសាងសង់លើផ្ទៃដីចំនួន ៤៨.៨៣០ម៉ែត្រការ៉េ មានអគារសរុបចំនួន១៥ខ្នង ក្នុងនោះសាងសង់ថ្មីចំនួន០៥ខ្នង និងជួសជុលកែលម្អចំនួន១០ខ្នង ការសាងសង់កែលម្អនេះចាប់ផ្តើមកាលពីថ្ងៃទី២០ ខែកុម្ភៈ ឆ្នាំ២០២០ និងបានបញ្ចប់នៅថ្ងៃទី២០ ខែកុម្ភៈ ឆ្នាំ២០២១ កន្លងទៅ។ ដោយឡែកមណ្ឌលស្តារនីតិសម្បទាអ្នកញៀនគ្រឿងញៀន សាងសង់លើផ្ទៃដីទំហំ ១៩.៧៤៨ម៉ែតការ៉េ បានចាប់ផ្តើមសាងសង់នៅថ្ងៃទី១៥ ខែមីនា ឆ្នាំ២០២១ នឹងបានបញ្ចប់នៅថ្ងៃទី១៥ ខែមករា ឆ្នាំ២០២២ នាពេលកន្លងមកថ្មីៗនេះ។អត្ថបទដោយ៖ លោក ឧត្តម បញ្ញារូបភាពដោយ៖ លោក វ៉ាន់ កុត្តរ៉ា